Saturday, May 4, 2013
JK AWAOMBA WAMILIKI WA SHULE BINAFSI KUPUNGUZA ADA ZAO, JE HII ITAWEZEKANA ? SOMA HAPA
SHULE zinazoendeshwa na kumilikiwa na taasisi na watu binafsi, zimetakiwa kurekebisha ada zao ili Serikali iangalie uwezekano wa kushirikiana nazo katika kulipia. Ushauri huo umetolewa na Rais Jakaya Kikwete katika mkutano wa Chama cha Wamiliki wa Vyuo na Shule Binafsi (TAMONGSCO) uliofanyika hivi karibuni katika ukukbi wa Mkapa mjini Mbeya.
Hatua hiyo ilitokana na mapendekezo ya Tamongsco yakitaka Serikali ipeleke wanafunzi kwao na kuwalipia ada, kupitia mfumo wa ushirikiano wa Sekta Binafsi na ya Umma (PPP).
Katika mapendekezo yao, walitaka Serikali ipunguze msongamano wa wanafunzi waliozidi katika shule zake, kwa kuwapeleka katika shule binafsi. Akijibu hoja hizo, Rais Kikwete, aliyealikwa kuhudhuria, alisema wazo hilo ni zuri lakini lina changamoto.
“Nimesikiliza kwa makini sana hoja yenu ya kutaka kushirikiana na Serikali kuondokana na msongamano wa wanafunzi katika baadhi ya shule zake. “Natambua kwamba wakati Serikali inahangaika kupunguza msongamano kwenye shule zake, baadhi ya shule zenu zina madarasa yaliyo wazi na zingependa kuletewa wanafunzi na Serikali,” alisema Rais.
Rais alifafanua kwamba pamoja na uzuri wa wazo hilo, suala hilo lina changamoto zake kutokana na ukweli kwamba gharama katika shule hizo ni kubwa, hivyo wazazi au Serikali hawataweza kumudu. Ombi la JK Kutokana na hali hiyo, Rais Kikwete katika mkutano huo wenye kaulimbiu ya ‘Changamoto na fursa zilizopo katika ushirikiano baina ya sekta ya umma na isiyo ya umma katika utoaji wa elimu bora’, alitaka walimu hao kujadili tatizo hilo la ada kubwa.
“Nina ombi moja kwenu ambalo napenda mlijadili kwenye mkutano wenu. Ombi lenyewe si geni, linahusu ada kubwa zinazotozwa na shule au vyuo vyenu. Wapo wananchi wengi ambao wangependa sana kunufaika na elimu nzuri mnayoitoa, lakini wanashindwa kutokana na ada inayotozwa kuwa kubwa.
“Sisemi ada zenu zifanane na za shule za Serikali, lakini baadhi ya shule na vyuo vyenu vinalalamikiwa na wananchi kwa kutoza ada kubwa na kwamba hazitabiriki kwani hupandishwa wakati wowote,” alisema Rais Kikwete.
Tathmini Pamoja na ombi hilo kwa Tamongsco, Rais Kikwete alisema Serikali kupitia Wizara ya Elimu na Mafunzo ya Ufundi, imeliona hilo na imeamua kulifanyia kazi. Alisema tathmini ya gharama halisi za uendeshaji kwa mwanafunzi mmoja, itafanywa ili kutoa ushauri stahiki kwa wamiliki wote wa shule au vyuo kuhusu kiwango cha ada.
Alirejea kauli yake, kwamba elimu ni huduma muhimu na haki kwa mtoto na si vema kugeuzwa kuwa biashara ya kuleta faida kubwa. Alisema hadi sasa uthamini kwa vyuo vya elimu ya juu umeshafanyika na mapendekezo ya gharama halisi yameandaliwa.
Rais alisema tayari hatua za kumpata mtaalamu elekezi zimefanyika, kwa ajili ya kutathmini gharama za uendeshaji kwa shule za sekondari. Hata hivyo, aliwahakikishia Tamongsco kuwa Serikali itaendelea kuwaunga mkono na kushirikiana nao, ili kuwawezesha vijana wengi zaidi wa kitanzania kupata elimu.
“Tutaendelea kupokea na kufanyia kazi ushauri wenu ili kuboresha zaidi mazingira ya uwekezaji kwenye sekta ya elimu.”
Sera ya Elimu Wakati huo huo, Serikali imesema Sera mpya ya Elimu inatarajia kuanza kutumika mwishoni mwa mwaka huu ambapo pia mitaala ya elimu itapitiwa upya, ili kwenda sambamba na sera hiyo.
Rais Kikwete alisema mchakato wa kutunga sera hiyo mpya ya elimu baada ya ile ya mwaka 1995, umefikia hatua za mwisho na kinachosubiriwa sasa ni maoni ya wabunge ili sera ikamilishwe.
“Naamini kabla ya mwisho wa mwaka huu, sera itakuwa tayari kutumika, tunaamini kuwa sera hiyo mpya italeta mabadiliko katika uendeshaji wa mifumo yetu ya elimu nchini, na kutoa majibu kwa maswali mengi,” alisema.
Kwa mujibu wa Rais Kikwete, nafasi ya sekta binafsi katika kuchangia maendeleo ya elimu nchini itafafanuliwa kwa upana na kina zaidi.
Alifafanua, kwamba mitaala mipya itakayotokana na sera hiyo, itakwenda sambamba na hali ya sasa na mahitaji ya maendeleo nchini na duniani, huku akiwahakikishia kuwepo kwa ushirikishaji wa wadau, wakiwamo wa sekta binafsi katika suala hilo. Idara ya Elimu Kuhusu Idara ya Ukaguzi wa Elimu, Rais alisema itapewa kipaumbele na Serikali inatambua kuwa hali ilivyo sasa hairidhishi.
“Serikali imeanza na inaendelea kuchukua hatua thabiti kuimarisha ukaguzi wa shule na vyuo nchini, miongoni mwa mambo yanayofikiriwa kufanywa ni kubadili Idara ya Ukaguzi kuwa taasisi inayojitegemea na kuiwezesha kwa rasilimaliwatu, vitendea kazi na fedha,” alisema
Alisema anaamini kwa njia hiyo, wataimarisha utendaji wa ukaguzi na matokeo yake yataonekana kwa muda mfupi na kuwakumbusha kuwa mkaguzi wa kwanza wa shule ni Mkuu wa Shule.
This post was written by: Author Name
Author description goes here. Author description goes here. Follow him on Twitter
Subscribe to:
Post Comments (Atom)
0 Responses to “JK AWAOMBA WAMILIKI WA SHULE BINAFSI KUPUNGUZA ADA ZAO, JE HII ITAWEZEKANA ? SOMA HAPA ”
Post a Comment
Ila tafadhali sana angalia usichafue hali ya hewa wala usijeruhi hisia za mtu/watu.